काठमाडौँ । भदौ २३ र २४ गते भएको जेन्जी आन्दोलनमा ज्यान गुमाएका युवाहरूको बलिदानलाई लिएर सार्वजनिक बहस चर्किएको छ। आन्दोलनका क्रममा सहिद भएका युवाहरूको रगत अन्ततः सत्ताको खेलमै सीमित हुने हो कि भन्ने प्रश्न सामाजिक सञ्जाल र राजनीतिक वृत्तमा उठ्न थालेको छ। जेन्जी आन्दोलन प्रणालीगत सुधार, सुशासन, उत्तरदायी नेतृत्व र युवाको आवाजलाई राज्यले सम्बोधन गर्नुपर्ने मागसहित सुरु भएको थियो। तर आन्दोलनपछि देखिएको राजनीतिक गतिविधिले उपलब्धि केवल नेतृत्व परिवर्तन वा प्रधानमन्त्रीको कुर्सीमा केन्द्रित हुने संकेत देखिएको भन्दै आलोचना बढेको छ। नागरिक समाज र युवाहरूले सहिदको बलिदान सत्ता प्राप्तिको माध्यम मात्र बन्न नहुने धारणा व्यक्त गरेका छन्। उनीहरूका अनुसार आन्दोलनको वास्तविक सम्मान तब मात्र हुन्छ, जब त्यसले नीति, संरचना र राजनीतिक संस्कारमा ठोस परिवर्तन ल्याउँछ। राजनीतिक विश्लेषकहरू भन्छन्—यदि बेरोजगारी, भ्रष्टाचार र दण्डहीनता उस्तै रह्यो भने अनुहार फेरिए पनि आन्दोलनको मर्म पूरा हुँदैन। यसले सहिदका सपना अधुरै रहने खतरा रहेको उनीहरूको ठहर छ। अब आन्दोलनबाट उदाएका नेतृत्व, राजनीतिक दल र सम्पूर्ण नागरिकमाथि उत्तरदायित्व थपिएको छ। जनअपेक्षा अनुसार सुधार नआएमा जेन्जी आन्दोलनप्रतिको भरोसा कमजोर हुने चेतावनीसमेत दिइएको छ।
यो पनि पढनुस !!