काठमाडौं । आगलागी तथा भूकम्पजस्ता प्राकृतिक तथा मानवजन्य विपद्बाट हुने क्षति न्यूनीकरण गर्ने उद्देश्यले आज बालाजु औद्योगिक क्षेत्रमा सुरक्षा सचेतना कार्यक्रम सम्पन्न भएको छ। उक्त कार्यक्रम प्रहरी वृत्त बालाजु, काठमाडौंको आयोजनामा तथा नेपाल प्रहरी विपद् प्रतिकार्य तथा तालिम केन्द्रको प्राविधिक सहयोगमा सञ्चालन गरिएको हो। कार्यक्रममा औद्योगिक क्षेत्रका उद्योगी, कामदार, स्थानीय बासिन्दा तथा सरोकारवाला निकायका प्रतिनिधिहरूको उल्लेखनीय सहभागिता रहेको थियो। सहभागीहरूलाई आगलागी तथा भूकम्पको जोखिम, त्यसबाट बच्ने उपाय, पूर्वतयारी, आपतकालीन अवस्थाको प्रारम्भिक प्रतिकार्य, सुरक्षित निकास, प्राथमिक उपचार तथा उद्धारका व्यवहारिक विधिबारे जानकारी दिइएको थियो। नेपाल प्रहरी विपद् प्रतिकार्य तथा तालिम केन्द्रका प्रशिक्षकहरूले आगलागी नियन्त्रणका उपकरणहरूको प्रयोग, भूकम्पका बेला अपनाउनुपर्ने सावधानी तथा सुरक्षित स्थान पहिचानबारे प्रत्यक्ष प्रदर्शनमार्फत प्रशिक्षण दिएका थिए। यस्ता विपद् जुनसुकै बेला आउन सक्ने भएकाले सतर्कता, समन्वय र समयमै सही निर्णय अत्यन्त आवश्यक हुने प्रशिक्षकहरूको भनाइ थियो। कार्यक्रममा बोल्दै प्रहरी वृत्त बालाजुका प्रतिनिधिले औद्योगिक क्षेत्रमा आगलागी तथा भूकम्पको जोखिम उच्च रहने भएकाले नियमित सचेतना कार्यक्रम आवश्यक रहेको बताए। उनले यस्ता कार्यक्रमले जनधनको क्षति न्यूनीकरण गर्न महत्त्वपूर्ण भूमिका खेल्ने उल्लेख गर्दै आगामी दिनमा पनि यस्ता गतिविधि निरन्तर गरिने जानकारी दिए। स्थानीय उद्योगी तथा सहभागीहरूले कार्यक्रम उपयोगी भएको प्रतिक्रिया दिँदै यस्ता व्यवहारिक तालिमले विपद्का बेला आत्मरक्षा तथा अरूको ज्यान बचाउन सहयोग पुग्ने बताएका थिए। कार्यक्रम २०८२ साल माघ ८ गते बालाजु औद्योगिक क्षेत्रमा सम्पन्न भएको हो।
यो पनि पढनुस !!