काठमाडौं । नेकपा एमालेका नेता प्रदीप ज्ञवालीले नेपाली कांग्रेसको विशेष महाधिवेशनमा प्रस्तुत दस्तावेज र त्यसमा भइरहेको बहसप्रति गम्भीर आपत्ति जनाएका छन्। गगन थापाको नाम नलिइकनै लक्षित गर्दै उनले संविधान र राष्ट्रियतामाथि भएका आक्रमणलाई जायज ठहर्याउने प्रवृत्तिले देशलाई गलत दिशातर्फ लैजान सक्ने चेतावनी दिएका छन्। ज्ञवालीले जारी विशेष महाधिवेशनका बहस, विमर्श र विवादलाई लोकतान्त्रिक आन्दोलनका सहयात्रीका रूपमा नजिकबाट नियालिरहेको उल्लेख गर्दै कांग्रेस मतभेदलाई सुझबुझपूर्ण ढंगले समाधान गर्दै अझ एकताबद्ध र सुदृढ बन्न सकोस् भन्ने कामना व्यक्त गरे। तर, कतिपय नेताका अभिव्यक्ति र पेस गरिएका दस्तावेजमा उठाइएको एउटा विषय अत्यन्त गम्भीर रहेको उनको भनाइ छ। उनका अनुसार भदौ २४ गते मुलुकमा घटेको विध्वंस र त्रासदीप्रति देखिएको रहस्यमय मौनता वा तुष्टिकरण चिन्ताजनक छ। यस्ता संवेदनशील घटनाप्रति स्पष्ट र जिम्मेवार धारणा नआउनु संविधान, लोकतन्त्र र राष्ट्रिय एकताका लागि जोखिमपूर्ण भएको उनले बताएका छन्। ज्ञवालीले सबै राजनीतिक दलले राष्ट्रिय हितलाई केन्द्रमा राखेर जिम्मेवार भूमिका निर्वाह गर्नुपर्ने आवश्यकता औँल्याएका छन्।
यो पनि पढनुस !!