म्याग्दीमा अहिलेसम्मकै ठूलो परिमाणमा अवैध हातहतियार बरामद, ११५ थान भरुवा बन्दुक जफत म्याग्दी प्रहरीले जिल्लाको इतिहासमै सबैभन्दा ठूलो परिमाणमा अवैध हातहतियार बरामद गरेको छ। जिल्ला प्रहरी कार्यालय म्याग्दीले जिल्लाका विभिन्न स्थानमा अवैध रूपमा लुकाइछिपाइ राखिएका ११५ थान भरुवा बन्दुक बरामद गरेको हो। प्रहरीका अनुसार उक्त अभियानलाई ‘अप्रेसन ब्राभो सेरा’ नाम दिइएको थियो, जुन मंसिर १५ गतेदेखि सञ्चालनमा आएको हो। अभियानका क्रममा बरामद भएका अधिकांश बन्दुकहरू स्थानीय स्तरमै निर्माण गरिएका र चल्ने अवस्थामा रहेको पाइएको छ। जिल्ला प्रहरी कार्यालय म्याग्दीले इजाजत पत्र बिना भरुवा बन्दुक राख्ने वा प्रयोग गर्ने कार्य कानुन विपरीत रहेको स्मरण गराउँदै यस्तो कसुरमा पाँच वर्षसम्म कैद र ५० हजार रुपैयाँसम्म जरिवाना हुन सक्ने कानुनी व्यवस्था रहेको भन्दै सर्वसाधारणलाई सचेत गराएको छ। प्रहरीले अवैध हातहतियार नियन्त्रणका लागि आगामी दिनमा पनि निगरानी र कारबाहीलाई थप कडाइ गर्ने जनाएको छ।
यो पनि पढनुस !!
Write to