Nepal Jana Khabar
हरेक जनताको खबर
१२ असार २०८१, मंगलवार

प्रक्रिया नबढाइदिँदा सुभाष मृतककै सूचीमा

विराटनगर — स्थानीय तहले राष्ट्रिय परिचयपत्र तथा पञ्जीकरण विभागमा ‘मृत्यु दर्ता’ खारेजी प्रक्रिया अघि नबढाइदिँदा मोरङको बेलबारीका सुभाष तामाङ सरकारी अभिलेखमा ‘मृतक’ नै रहेको पाइएको छ । भोजपुरको साविक कुदाकाउले ९ (हालको षडानन्द नगरपालिका–२) पुर्ख्यौली घर भएका तामाङको साउदी अरबमा हुँदा उतै मृत्यु भएको झूठो खबर आएको थियो ।

आफ्नै ‘मृत्यु दर्ता प्रमाणपत्र’ साथ मोरङ बेलबारीका सुभाष तामाङ । तस्बिर : विनोद भण्डारी/कान्तिपुर

२०७२ साउन ६ गते तामाङको कुदाकाउले–९ मा मृत्यु दर्ता भएको थियो । मोरङको बेलबारी नगरपालिका–११ लक्ष्मीमार्गमा बसाइँ सरेका तामाङ तीन वर्षदेखि आफ्नो मृत्यु दर्ता खारेज गर्न प्रशासनमा धाउँदै आएका छन् ।‘मृत्यु दर्ता गर्ने निकायको लापरबाहीका कारण राष्ट्रिय परिचयपत्र तथा पञ्जीकरण विभागको अनलाइन सिस्टममा उनी मृतक नै छन्,’ विभागका निर्देशक युवराज कट्टेलले भने, ‘मृत्यु दर्ता गर्ने स्थानीय निकायले अहिलेसम्म उनी जीवितै भएको र मृत्यु दर्ता राष्ट्रिय अभिलेखबाट हटाउन विभागसमक्ष सिफारिस नगरेकाले यस्तो भएको हो ।

मोरङ प्रशासनबाट विभागको अभिलेखबाट मृत्यु दर्ता हटाउन माग भए पनि सम्बन्धित निकायले अभिलेखसहित दर्ता बदर गर्न माग नगरेसम्म हटाउन सक्ने प्रावधान नरहेको कट्टेलको भनाइ छ । ऐनको दफा २४ मा कुनै व्यक्तिको झूटो विवरण दाखिल गरी दर्ताको प्रमाणपत्र लिएको प्रमाणित भए स्थानीय अधिकारीले त्यस्तो दर्ताको प्रमाणपत्र रद्द गर्न सक्ने प्रावधान छ ।

प्रमुख जिल्ला अधिकारीले सम्बन्धित पालिकालाई र पालिकाले वडा कार्यालयमा सिफारिस पठाएर वडाले दर्ता खारेजीका लागि विभागमा पठाउनुपर्ने प्रावधान रहेको उनले बताए । प्रक्रिया पुग्नासाथ अभिलेखवाट सुभाषको मृत्यु दर्ता हट्ने कट्टेलको भनाइ छ । सुभाषको मृत्यु दर्ता गर्ने भोजपुरका तत्कालीन स्थानीय पञ्जिकाधिकारी र जीवितै हुन् भनेर सिफारिस गर्ने बेलबारी–११ का वडा अध्यक्षको नाम एउटै भएकाले जालसाजी भएको हुन सक्ने आशंका बढेको उनले बताए ।

सम्बन्धित खवरहरु

प्रतिक्रिया

Your email address will not be published.