चितवन । नारायणगढ–मुग्लिन सडकखण्ड अन्तर्गत सिमलताल क्षेत्रमा करिब १८ महिनाअघि दुर्घटनामा परेर त्रिशूली नदीमा खसेको यात्रुबाहक बसको अवशेष घटनास्थलबाट करिब ३०० मिटर दूरीमा फेला परेको छ। स्थानीयवासीले नदी किनारमा बसका केही फलामे संरचना र सिटका टुक्रा देखेपछि प्रहरीलाई जानकारी गराएका थिए। सूचना पाएलगत्तै इलाका प्रहरी कार्यालयबाट खटिएको टोलीले घटनास्थल पुगेर अवशेष संकलन गरेको हो। प्रहरीका अनुसार नदीको बहाव, बाढी र पहिरोका कारण बसका अवशेष बग्दै हाल उक्त स्थानमा देखिएको हुन सक्ने अनुमान गरिएको छ। अवशेष भेटिएपछि थप खोजी तथा अनुसन्धानलाई तीव्र बनाइएको छ। उक्त दुर्घटनामा केही यात्रु बेपत्ता भएका थिए। अवशेष फेला परेसँगै पहिचान, प्रमाण संकलन तथा आवश्यक परीक्षण प्रक्रिया अघि बढाइने प्रहरीले जनाएको छ। स्थानीय प्रशासनले सर्वसाधारणलाई अफवाह नफैलाउन र आवश्यक जानकारी भए सुरक्षाकर्मीलाई उपलब्ध गराउन आग्रह गरेको छ।