काठमाडौं, 23 भदौ । पछिल्लो समय विश्वभर ‘नेपो बेबी’ भन्ने शब्द निकै चर्चामा आएको छ । यो शब्द Nepotism Baby (नेपोटिज्म बेबी) को छोटकरी हो, जसले आफ्ना आमा–बुबा वा परिवारको सामाजिक, राजनीतिक वा आर्थिक हैसियतका कारण अवसर पाएका सन्तानलाई जनाउँछ ।
सिनेमादेखि राजनीति र व्यवसायसम्म – यस्ता छोराछोरीलाई अवसर पाउन संघर्ष गर्नु पर्दैन, बरु परिवारकै प्रभावमा उनीहरू छिट्टै स्थापित हुन्छन् भन्ने आरोप लाग्छ । यही कारणले “नेपो बेबी” शब्द अहिले सामाजिक सञ्जालदेखि मिडियामा तहल्का मच्चाइरहेको छ ।
नेपालमा यसको सन्दर्भ
राजनीतिमा : स्थापित नेताहरूका छोराछोरी वा परिवारजनले सजिलै टिकट पाउने, पद पाउने, र संघर्ष नगरी नेतृत्वमा प्रवेश गर्ने परम्परा लामो समयदेखि छ । धेरै दलमा यही प्रवृत्ति अहिले विवादको कारण बनेको छ ।
सिनेमाक्षेत्रमा : कलाकारका सन्तानले संघर्ष नगरी नै फिल्ममा मुख्य भूमिका पाउने प्रचलन देखिन्छ । जबकि प्रतिभावान नयाँ कलाकारलाई अवसर पाउन निकै कठिनाइ हुन्छ ।
व्यवसायमा : ठूला उद्योगपति वा व्यापारीका छोराछोरीले सजिलै लगानी, पहुँच र बजार पाउने भएकाले उनीहरूलाई सफलताको बाटो छोटो हुन्छ ।
किन तहल्का ?
नेपो बेबीको बहस विश्वमा त वर्षौंदेखि चल्दै आएको भए पनि नेपालमा यो अहिले सामाजिक सञ्जालमार्फत बढी उठान पाएको छ । युवाहरूले अवसर र न्यायको सवालमा प्रश्न उठाउन थालेका छन् ।
आम मानिसले आफ्नो संघर्ष र ‘नेपो बेबी’ हरुको सहज सफलता बीचको असमानता तुलना गर्न थालेका छन् ।
मिडियाले समेत यसलाई सेलिब्रेटी जीवनशैली र राजनीतिक अभ्याससँग जोडेर प्रस्तुत गर्दा विषय थप तातिएको छ ।