मेयर बस्नेतले शंकर होटलमा बिहेभोज दिँदा घरजग्गा व्यवसायी राजुप्रसाद कँडेलले रकम तिरिदिएको भेटिएको छ। कँडेलले मेयरका छोराको बिहेभोजमा शंकर होटलमा २४ लाख ७२ हजार ६ सय ३७ रूपैयाँ तिरिदिएको र त्यो रकम घुसवापत् भुक्तान गरेको अख्तियारले अभियोगपत्रमा उल्लेख गरेको छ। मेयरजस्तो सार्वजनिक पदमा रहेका व्यक्तिको छोराको बिहेभोजको रकम प्रत्यक्ष स्वार्थ जोडिएका विवादित व्यवसायीले यति ठूलो रकम तिर्नु घुस नै भएको निष्कर्षसाथ अख्तियारले भ्रष्टाचार मुद्दा दायर गरेको छ।
मेयर बस्नेतका भ्रष्टाचारजन्य कार्यमा श्रीमती उर्मिला बस्नेतको पनि मिलेमतो रहेको अख्तियारको निष्कर्ष छ। नगर प्रमुखको पद तथा ओहोदाको दुरुपयोग गरी घरजग्गा व्यवसायी कँडेलको स्वार्थामा काम गरिदिएवापत् २ करोड १५ लाख ७३ हजार ३९५ रूपैयाँ बैंक खातामार्फत् घुस लिएको पाइएको अख्तियारका अनुसन्धान अधिकृतले बताएका छन्। ती अधिकृतका अनुसार, ६ करोड ८२ लाख मूल्य बराबरको जग्गा नै बस्नेत दम्पतीले हात पारेका छन्।
होटलमा तिरेको बिहेभोजको रकम, बैंकमा पठाइदिएको पैसा र जग्गासमेत गरी ९ करोड २२ लाख ४६ हजार रूपैयाँ मेयर बस्नेतले भ्रष्टाचार गरेको हिसाब अख्तियारले अदालतमा प्रस्तुत गरेको छ।